Category: ლექტორების ბლოგი

1. მსოფლიოში, რომელშიც სოციალურ მედია აკავშირებს ადამიანებს და ბრენდებს, რამდენად არის სოციალური მედიის ღრმა გაგება მნიშვნელოვანი და ღირებული?

სოციალური მედია იქცა ჩვენი ცხოვრების განუყოფელი ნაწილად, რომელიც აკავშირებს ადამიანებს მსოფლიოს ყველა კუთხიდან. მან მოახდინა რევოლუცია ჩვენს კომუნიკაციაში, ინფორმაციის გაზიარებაში და ბიზნესის წარმართვაშიც კი. გარდა ამისა, სოციალურმა მედიამ გადამწყვეტი როლი ითამაშა მნიშვნელოვანი სოციალური საკითხების შესახებ ცნობიერების ამაღლებისა და პოზიტიური ცვლილებების ხელშეწყობაში. ის იქცა აქტივიზმის მძლავრ ინსტრუმენტად, რომელიც საშუალებას გვაძლევს გამოვხატოთ ჩვენი მოსაზრებები. რადგან ჩვენ ვაგრძელებთ ციფრული ეპოქის ათვისებას, სოციალური მედია უდავოდ გააგრძელებს ჩვენი სამყაროს ფორმირებას.

2. როგორ იყენებენ კომპანიები სოციალურ მედიას?

. ნებისმიერი ზომის და ტიპის ბიზნესისთვის, იქნება ეს სტარტაპი თუ მრავალწლიანი კომპანია, მნიშვნელოვანია სოციალური მედია, იმისათვის, რომ უფრო მეტად გაზარდოს ცნობადობა ბრენდის მიმართ, მოიზიდოს ახალი მომხმარებლები, შექმნას ბრენდის იდენტობა და რაც მთავარია, უფრო ახლოს იყოს მომხმარებლებთან და ზუსტად იცოდეს რა და როგორ შესთავაზოს მათ.

3. რითი დაეხმარება პიარსკოლის სტუდენტებს თქვენი ლექციები?

უფრო მეტად გააცნობიერონ რამხელა ძალაა სოციალური მედია. თითოეული სოციალური მედია პლატფორმის შესახებ გაიგონ ინფორმაცია და შემდეგ უკვე, პრაქტიკაში სწორად გამოიყენონ თითოეული მათგანი. რამხელა მნიშვნელობა აქვს სწორად დაგეგმილ რეკლამას და საერთოდ რატომ უნდა დახარჯონ შემდგომში კომპანიის ბიუჯეტი სოციალური მედიის რეკლამაში.

4. რას ურჩევდით სოციალური მედიით დაინტერესებულ ადამიანებს?

თუ გაინტერესებთ სოციალური მედია, აუცილებლად ღრმად უნდა შესცუროთ და ნამდვილად მოგეწონებათ ეს მრავალფეროვანი სამყარო თავისი, მრავალმხრივი საინტერესო ნაწილებით.

P.S  მუდმივად გატესტეთ ყველაფერი, ვიზუალებიდან დაწყებული აუდიტორიებით დამთავრებული!

   1.რა მნიშვნელობა აქვს მედია მენეჯმენტს დღევანდელ სამყაროში?

მედია ჯერ კიდევ რჩება სამიზნე აუდიტორიასთან კომუნიკაციის ერთ-ერთ მთავარ არხად. გარდა იმისა, რომ ტრადიციული, თუ ალტერნატიული მედია ჩვენთვის სასურველი ინფორმაციის გავრცელების საშუალებაა, მათ შეუძლიათ, კომპანიისა და კონკრეტული პირებისთვის საკომუნიკაციო კრიზისის შექმნა და გამძაფრებაც. შესაბამისად, არანაკლკებ მნიშვნელოვანია მედიასთან სტაბილური და კარგი ურთიერთობის შენარჩუნება.

  2.შეგიძლიათ გაგვიზიაროთ მედიამენეჯმენტის წარმატებული ისტორიის მაგალითი?

ნებისმიერი დიდი ბრენდის მედიასთან ურთიერთობა შეგვიძლია მოვიყვანოთ მაგალითად. ბაზარზე მოთამაშე ლიდერი ბრენდები საკმაოდ დიდ ინვესტიციას დებენ პიარსა და მარკეტინგში, რაც, თავისთავად, მოიცავს მედიასთან ურთიერთობასაც. რაც შეეხებათ უფრო მცირე ბიუჯეტიან კომპანიებს, ორგანიზაციებსა, თუ უბრალოდ საჯარო პირებს, ამ შემთხვევაში გადამწყვეტი ღიაობა, გულწრფელობა და გამჭვირვალობაა.

  3.რას სთავაზობს თქვენი ლექციები პიარსკოლის სტუდენტებს?

პიარსკოლისათვის სალექციო კურსის შედგენისას, აქცენტი ორ რამეზე გავაკეთე. პირველი – ვეცადე სტუდენტებისთვის მიმეცა ის პრაქტიკული ცოდნა, რაც სამომავლოდ აუცილებლად გამოადგებათ, თუკი ამ სფეროში გეგმავენ მუშაობას. მათ შეექმნებათ წარმოდგენა, როგორ მზადდება ესა თუ ის მედია პროდუქტი ჟურნალისტების მიერ; რა ინფორმაცია უნდა გაამზადონ ჟურნალისტებისთვის, რომ სასურველი მედია პროდუქტი მიიღონ; ზოგადად, რა მედია პროდუქტები არსებობს ქართულ ბაზარზე და რატომ არ არის ყველაფერი „სიუჟეტი“. ასევე, ისწავლიან, როგორ უნდა შეადგინონ მედია გეგმა და ბიუჯეტი. მეორე – როგორ შეიძლება ვიყოთ ორიგინალურები ინფორმაციის სამიზნე აუდიტორიაში გავრცელების დროს, რადგან მედია მხოლოდ ტელევიზია არ არის. რა თქმა უნდა, ეს ყველაფერი მაგალითების წარდგენისა და თითოეული ქეისის განხილვის ფონზე მიმდინარეობს. მედია მენეჯმენტის კურსი არ არის მონოლოგის ფორმატი. ძალიან მნიშვნელოვანია, ჯგუფის თითოეულმა წევრმა გამოხატოს საკუთარი აზრი, რადგან ქეისები, რომლებსაც წარვადგენთ, არ არის უნაკლო.

 4.რა რჩევას მისცემდით პიარსკოლელებს და მედიამენეჯმენტით დაინტერესებულ ადამიანებს?

იმავეს, რასაც პიარსკოლელებს კურსის ბოლოს ვეუბნები ხოლმე – ჩართეთ თქვენი ფანტაზია, რადგან მედია ბევრის საშუალებას იძლევა. ასევე, ნუ იქნებით აგრესიულები მედიის წარმომადგენლების მიმართ, როდესაც ისინი, ავად თუ კარგად, თავიანთ საქმეს აკეთებენ.

 

1. როგორ მოქმედებს თხრობის ხელოვნება სხვადასხვა სფეროსა თუ ინდუსტრიაში?

თუ კარგად დავაკვირდებით, აუცილებლად აღმოვაჩენთ, რომ ყველა დროსა და ეპოქაში, ყველა ქვეყანასა და ერში, დიდსა თუ პატარაში, მდიდრებსა თუ ღარიბებში, უმთავრესი და უმნიშვნელოვანესი იყო ამბავი. ჯერ კიდევ მაშინ, სანამ წერა-კითხვას დაეუფლებოდნენ, ყველაზე მნიშვნელოვანი ამბები ზეპირსიტყვიერად გადაეცემოდა თაობიდან თაობას, გაივლიდა ასწლეულებსა თუ ათასწლეულებს და ასე აღწევდა თანამედროვე საზოგადოებამდე. თუმცა, ერთია ამბავი და მეორე – როგორ გადასცემ, მიაწვდენ, შეფუთავ ამ ამბავს ანუ ცალკე ხელოვნებაა ამბის თხრობა.

ნებისმიერ სფეროსა თუ ინდუსტრიას, კერძო ბიზნესსა თუ სახელმწიფო სტრუქტურას საკუთარი საქმიანობისა თუ იმიჯისთვის, რეკლამირებისა და საზოგადოებასთან ურთიერთობისთვის სჭირდება ამბავი, რომელსაც რაც უფრო შთამბეჭდავად გადასცემს სამიზნე აუდიტორიას, თავის უშუალო სეგმენტს, მით წარმატებული იქნება და გარანტირებულად დაიკავებს მეწინავე ადგილს. ადამიანებს ნაკლებად ამახსოვრდებათ სტატისტიკა და მშრალი ფაქტები, კარგად მოთხრობილი ისტორია კი იშვიათად ტოვებს ვინმეს გულგრილს.

2. ინფორმაციით სავსე სამყაროში, როგორ შეიძლება მივიპყროთ აუდიტორიის ყურადღება ამბის თხრობის ხელოვნების ეფექტურად გამოყენებით სასურველი შედეგის მისაღებად? რამე მაგალითს ხომ ვერ გაიხსენებდით?

სამყაროში, სადაც დრო იმაზე სწრაფად მიქრის, ვიდრე წარმოგვიდგენია, სადაც სხვადასხვა ტექნოლოგიით ყოველდღიურად ლამის სასწაულების მხილველები ვხდებით, სადაც ზედმეტს აღარავინ ლაპარაკობს და ისმენს, სასურველი შედეგის მისაღწევად მართლაც მნიშვნელოვანია სწორი ფორმისა და ხერხის, შესაფერისი ამბის ეფექტურად შერჩევა. ეს ერთის მხრივ რთული, მეორეს მხრივ კი მეტად აზარტული და საინტერესო ამოცანაა, რომლის გადაჭრაც უდიდესი სიამოვნების მომგვრელია. ამბის თხრობის ხელოვნება სწორი კომუნიკაციის საწინდარია.

ერთ-ერთ გამორჩეულად და დღესდღეობით აქტუალურად მიმაჩნია კამპანია, რომელიც პოპულარული პლატფორმის StelloGirls-ის დამფუძნებელმა აწარმოვა. მას სურდა, ახალ თაობას მეტი გაეგო ჰოლოკოსტის შესახებ და ამ მიზნით გამოიყენა რეალური ამბავი, რომელიც ევა ჰეიმანს გადახდა თავს. პირველსავე ბილბორდმა დიდი ვნებათაღელვა გამოიწვია და ყურადღება მიიქცია – რა იქნებოდა, ჰოლოკოსტის გოგონას ინსტაგრამი რომ ჰქონოდა? და პოსტერებზე მავთულხლართებს მიღმა მოზარდი გოგონას გამხდარ ხელს სმარტფონი ეჭირა. ასე გაჩნდა ექაუნთი – Eva’s Stories. ევას დღიურის მიხედვით ყოველდღიურად იდებოდა პოსტები. შედეგმა მოლოდინს გადააჭარბა. კამპანიამ, რომელიც ისრაელელი ახალგაზრდების გაცნობიერებას ისახავდა მიზნად, იმაზე მეტი ადამიანი ჩაითრია, ვიდრე ამას ვინმე წარმოიდგენდა. ჩემთვის, სწორედ ეს იყო ერთ-ერთი ყველაზე ეფექტური ხერხი და ამბის თხრობის ხელოვნების თვალსაჩინო მაგალითი.

3. რისი მიღება შეუძლიათ სტუდენტებს თქვენი ლექციებიდან და რამდენად შესაძლებელია ამ ცოდნის რეალიზება მათ საქმიანობაში?

ჩვენ ეპოქაში, სადაც ცხოვრება „სთორებად“ იქცა, ყოველდღიურობა გვკარნახობს, რომ, დიახ, ამბავი მნიშვნელოვანია და, დიახ, თანამედროვეობა ჩვენგან ამ ამბის თხრობის განსაკუთრებულ ხერხებსაც ითხოვს. ვისურვებდი, ერთად გაგვეაზრებინა, რა ამბის და რა ფორმით გაზიარებას გადავწყვეტდით. შევეცადოთ, მოვყვეთ საკუთარ ამბებს, ოღონდ ისე, რომ ის დამაინტრიგებელი, ჩამთრევი, ემოციური და აქტუალური იყოს. ყველას ცხოვრებას აქვს რაღაც უნიკალური და განუმეორებელი, უბრალოდ მას შესაბამისი დანახვა და წარმოჩენა ჭირდება.

4. რას ურჩევდით პიარსკოლის სტუდენტებს?

სწორად შეაფასონ, ვის, რას და რატომ უყვებიან. ვინ არის მათი აუდიტორია, ვისზე ცდილობენ ზემოქმედებას და რა არის მათი მიზანი. ამ შემთხვევაში ამბავიც მოიძებნება და ამ ამბის თხრობის ყველაზე ეფექტური ხერხიც. არასდროს დაიღალონ ძიებით, არ დანებდნენ და იბრძოლონ სასურველის მისაღწევად, რადგან ბრძოლას ყოველთვის აქვს აზრი, მთავარია, ამბებს სულიერება არ  დაუკარგონ.