Tag: პიარსკოლა

ინტერვიუ „ალტაოქეის“ მარკეტინგის დეპარტამენტის დირექტორ თამუნა როსტიაშვილთან.

-რატომ გადაწყვიტეთ ამ სფეროში საქმიანობა და რა შესაძლებლობებს იძლევა, მარკეტინგი კარიერული ზრდის თვალსაზრისით?

დავამთავრე თბილისის სახელმწიფო უნივერსიტეტი ეკონომიკის და ბიზნესის ფაკულტეტი, ბიზნეს ადმინისტრირების მიმართულებით, თავის მხრივ ვიწრო სპეციალობად ფინანსები ავირჩიე, მაგრამ მარკეტინგის მოდულები ყოველთვის რჩებოდა დამატებით საგნებად, რადგან ჩემთვის ყოველთვის საინტერესო იყო. როდესაც ჩემი პროფესიული მოღვაწეობა დავიწყე, მარკეტინგი იყო სწორედ ის მიმართულება, რომლშიც დავიწყე გამოცდილების დაგროვება.

მარკეტინგის სფეროში უკვე 8 წელია ვმოღვაწეობ.

მარკეტინგის სფერო არის აქტიური, საინტერესო და მრავალფეროვანი, რომელიც მუდმივად ახალ გამოწვევებს გვთავაზობს. ამ სფეროში მუშაობისას უნდა იყოს მიზანდასახული, კომუნიკაბელური და მოტივირებული ამა თუ იმ პროექტის და ყოველდღიური ამოცანების და გამოწვევების განხორციელებისთვის.

რატომ მარკეტინგი? რადგან ის დაკავშირებულია ინოვაციებთან. ეს საუკუნე კი ცვლილებების პერიოდია, რომლებთანაც მუდმივად  უნდა მოვახდინოთ ადაპტირება. მარკეტინგი ხელს უწყობს ინოვაციას. ის გვეხმარება, ვიფიქროთ ჩარჩოების მიღმა და შევქმნათ ახალი მიდგომები სხვადასხვა საკითხებისთვის და პრობლემებისთვის. ეს არის ის, რაც ბიზნესის სამყაროში განსხვავებას, ინოვაციასთან ადაპტირებისა და შესრულების საშუალებას იძლევა. ამიტომაც მარკეტინგის პროფესია თქვენს ცხოვრებაში ბევრ პოზიტივს მოიტანს.

–რა არის საჭირო საზოგადოებასთან, წარმატებული კომუნიკაციის ჩამოსაყალიბებლად?

მნიშვნელოვანია, სწორი კომუნიკაციის ჩამოყალიბება, ინფორმაციის სწორად მიწოდება და იმის განსაზღვრა, თუ რა გზით ვაწვდით ამ ინფორმაციას.

როგორც მარკეტინგი, ყოველთვის ვცდილობ გავითვალისწინო მომხმარებლის ინტერესები და სურვილები და სწორი კომუნიკაცია მოვახდინო მათთან.

3 რჩევა, რომელსაც მისცდემდით მათ, ვისაც ამ სფეროში მოღვაწეობა სურს

პირველ რიგში, უნდა იყოთ სოციალური, უნდა გქონდეთ პიროვნული და პროფესიონალური თვისებების ერთობლიობა, რომელიც საშუალებას მოგცემთ ეფექტურად იმუშაოთ გუნდთან, მიიღწვოდეთ თქვენი მიზენებისთვის, იყოთ გამბედავი, კრეატიული. უნდა შეგეძლოთ გეგმის მიხედვით მოქმედება და სწორი რეაგირება სხვადასხვა პროცესებზე.

წარმატებული მარკეტინგის სპეციალისტი უნდა იყოს “flexible”, გახსნილი, კარგი მსმენელი, კრეატიული, მომხმარებელზე ორიენტირებული.

–როგორია თქვენი ტიპიური სამუშაო კვირა?

სფერო, რომელშიც დღეს ვმოღვაწეობ არის ძალიან აქტიური. ყოველი სამუშაო კვირა არის მრავალფეროვანი, მოიცავს სხვადასხვა მარკეტინგული ნაბიჯების დაგეგმვისა და იმპლემენტაციის პროცესს, კომუნიკაციას პარტნიორებთან, საზოგადოებასთან და თანამშრომლებთან.

-რა თვისებებს აფასებთ ადამიანებში, სამუშაო გარემოში?

პასუხისმგებლობის მაღალი გრძნობა, შრომისმოყვარეობა, მიზანდასახულობა – ეს არის ის თვისებები, რასაც ვაფასებ ადამიანებში.

ინტერვიუ  სახელმწიფო შესყიდვების სააგენტოს საზოგადოებასთან ურთიერთობის მენეჯერ  მარტა ქარუმიძესთან

– რატომ გადაწყვიტეთ ამ სფეროში საქმიანობა და რა შესაძლებლობებს იძლევა, პიარი კარიერული ზრდის თვალსაზრისით?

პიარ საქმიანობა ყოველთვის მაინტერესებდა, ხშირად ვადევნებდი თვალს პიარის უცხოურ მოდელებს, მაინტერესებდა რითი გამოირჩეოდნენ ისინი, რა გვქონდა საერთო… წლების მანძილზე ჟურნალისტიკის სფეროში ვმუშაობდი, შემდეგ მივიღე გადაწყვეტილება ამ სფეროში გადმომენაცვლა. საინტერესო პროფესიაა, მუდმივი სიახლეებითა და გეგმით, რომელიც შედეგით უნდა დასრულდეს. ხალხთან კომუნიკაცია ძალიან მომწონს, მიყვარს მათი ხედვისა და იდეების მოსმენა, ეს შემდგომ გეხმარება საქმიანობის სწორად წარმართვაში.

– რა არის საჭირო საზოგადოებასთან, წარმატებული კომუნიკაციის ჩამოსაყალიბებლად?

ურთიერთობის უნარი და კომუნიკაცია, რომელიც არ უნდა გეზარებოდეს. თუ მოინდომებ ყველაფერი გამოდის, მთავარია სურვილი გქონდეს.

– 3 რჩევა, რომელსაც მისცდემდით მათ, ვისაც ამ სფეროში მოღვაწეობა სურს

რჩევის მიცემა გამიჭირდება. ზოგადად ყველას ინდივიდუალური მიდგომა აქვს. ვფიქრობ, ვისაც პიარში უნდა მუშაობის დაწყება:

1. მუდმივად უნდა ჰქონდეს ახალი იდეები, უნდა შეძლოს საზოგადოებამდე ამ იდეების სწორად მიტანა.
2. სწრაფი რეაგირება, ვინაიდან დაგვიანებული რეაქცია შეიძლება არასწორად შეფასდეს.
3. აკეთეთ მთელი გულით თქვენი საქმე, აუცილებლად მოსინჯეთ თქვენი ძალები, მაგრამ თუ თქვენ ფიქრობთ, რომ თქვენი ადგილი არაა ამა თუ იმ სფეროში, მაშინ განაგრძეთ ძებნა. ადამიანების განწყობა საკუთარი სამსახურის მიმართ ყოველთვის აისახება საქმესა და შედეგზე.

– როგორია თქვენი ტიპიური სამუშაო კვირა?

ვუყურებ საინფორმაციო გამოშვებებს, ვეცნობი საინფორმაციო პორტალზე განთავსებულ სიახლეებს, ვურთიერთობ საზოგადოებასა და მედიასთან, მათთვის საინტერესო კითხვებს ვპასუხობ, ჩართული ვარ ჩვენი გუნდის სხვა წევრებთან ერთად ღონისძიებების, შეხვედრების ორგანიზებაში, ვწერ პრესრელიზებს და ა.შ.

– რა გზები მიგაჩნიათ საუკეთესოდ კონტაქტების და წყაროების მოსაპოვებლად?

ისევ კომუნიკაციის უნარი. თუმცა, თუ გავითვალისწინებთ, რომ საქართველოში ყველა ყველას იცნობს, საქმე მარტივდება. მე 10 წელზე მეტ ხანს ვმუშაობდი ჟურნალისტიკაში სხვადასხვა პოზიციაზე. ვფიქრობ, ჩემი პროფესია ძალიან დამეხმარა კონტაქტების მოპოვებაში.

– რა უნარებია საჭირო წარმატებული პიარ მენეჯერისთვის?

ჩემი აზრით, წარმატებას აქვს თავისი ეტაპები, გააჩნია ვის რა ეტაპი აკმაყოფილებს. ზოგადად მიმაჩნია, რომ ნებისმიერი წარმატება მიიღწევა შრომით. არ აქვს მნიშვნელობა პროფესიას, უბრალოდ არ უნდა დაგეზაროს. შეიძლება დროში გაიწელოს, მაგრამ წარმატება აუცილებლად მოვა.

– რა არის საუკეთესო პიარ პრაქტიკა რომელსაც ტექნოლოგია ვერ შეცვლის?

უბრალოდ, ადამიანური ურთიერთობები. ამას ვერაფერი ჩაანაცვლებს.

– რა ტრენდები და ინოვაციები იკვეთება საზოგადოებასთან ურთიერთობის სფეროში?

ბუნებრივია გასულ წლებთან შედარებით ყველაფერი შეცვლილია. ამას ხელი შეუწყლო სოციალურმა ქსელებმა. დღეს უფრო გამარტივდა საზოგადოებასთან ურთიერთობა, სოციალური ქსელი არის ერთ-ერთი მნიშვნელოვანი და მოქნილი წყარო 21-ე საუკუნეში მთელი მსოფლიოს მასშტაბით, როგორც აზრის დაფიქსირების თვალსაზრისით, ასევე კონკრეტული ფაქტის თუ პროდუქტის ცნობადობის გაზრდის კუთხით. დღეს ყველანაირი საშუალება არსებობს, რომ უფრო ეფექტურად წარმოაჩინო ორგანიზაცია, ბრენდი, დააფიქსირო აქტივობა. ამას თანამედროვე ტექნოლოგიები უწყობს ხელს.

ინტერვიუ პსპ-ს  სააფთიაქო ქსელის მარკეტინგის ხელმძღვანელ თორნიკე გურულთან.

-რა სპეციალობის ბრძანდებით?

რამდენიმე უნივერსიტეტი მაქვს დამთავრებული. საქართველოში ტექნიკურ უნივერსიტეტში პიარის მიმართულება დავამთავრე, ასევე პედაგოგიკის მიმართულება და გერმანიაში University of Technology Chemnitz, მედია კომუნიკაციის სპეციალობით.

-პირველი სამსახური:

უკვე დიდი დრო გავიდა, მას შემდეგ, რაც პირველად ვიშოვე ფული. ერთმანეთისაგან გავმიჯნავდი ფულის შოვნას და სამსახურს. 16 წლიდან დავიწყე ფულის შოვნა. სხვადასხვა დროს მიმუშავია მუშად, მიმტანად, უცხო ენების მასწავლებლად, ბიბლიოთეკარად, გიდად, სამკერვალო ფაბრიკაში თარჯიმნად და რა ვიცი, კიდევ რად აღარ. მსახიობის ჰონორარიც კი მაქვს მიღებული, კლიპებში მიღებდნენ ხოლმე.

პირველი, ყველაზე სერიოზული, სამსახური საერთაშორისო ტრენერობა იყო. თან ვსწავლობდი და თან ტრენინგებს ვატარებდი. საერთაშორისო ტრენერების მომზადების სამ წლიან პროგრამაში ვიღებდი მონაწილეობას და პარალელურად, ტრენინგებს მატარებინებდნენ, რომელშიც ძალიან კარგი ფული გამოვიმუშავე. პირველი ტრენინგი ვროცლავში (პოლონეთი) ჩავატარე. მაშინ ბოშის ფონდის ერთ-ერთი პროგრამის თეოდორ ჰოისის კოლეგიის 20 მონაწილე მყავდა და ჩემს პოლონელ და გერმანელ კოლეგებთან ერთად, მათ სოციალური პროექტების მართვას ვასწავლიდი.

-ახლანდელი სამსახური და პოზიცია?

ახლაც ბევრი მიმართულებით ვმუშაობ. პსპ-ში სააფთიაქო ქსელის მარკეტინგს ვხელმძღვანელობ, ასევე მართვის აკადემიის ტრენერი ვარ მარკეტინგისა და პიარის მიმართულებით. ასევე ილიას სახელმწიფო უნივერსიტეტში პიარის პროგრამის ხელმძღვანელი და სრული პროფესორი ვარ.

პატარა ბიზნესებიც მაქვს – საყვარელი ჰოსტელი ბროსეს ქუჩაზე და ტურისტული კომპანია.

– თქვენი პირველი წარმატება?

პიარის მიმართულებით შეიძლება წარმატებულად ჩავთვალო ჩემი გამოცდილება „საქართველოს ახალგაზრდა იურისტთა ასოციაციაში“. აქ პიარის მიმართულებით ვმუშაობდი და ბევრი საინტერესო ქეისი გვქონდა. ესენი იყო: სანდრო გირგვლიანის ქეისი, ზურა ვაზაგაშვილის ქეისი და ბევრი ადამიანის უფლებების დაცვისათვის მიმართული კამპანიები.

–თქვენს მიერ გაკეთებული საქმე, პროექტი, რომლითაც დღემდე ამაყობთ?

ყველა პროექტი, რომელსაც მე ვაკეთებ ძალიან მიყვარს. თითქოს ჩემი მეგობრებივით არიან.

კომერციული მიმართულებით გამოვყოფდი სუპერმარკეტების სმარტის ქსელს. ეს ბიზნესი ვისოლ ჯგუფის შვილობილი კომპანიაა და იდეიდან ქსელამდე ჩემს ხელში ჩამოყალიბდა. ასევე პსპ აფთიაქის ახალი კონცეფციის აფთიაქები. 23 წლიანი გამოცდილების ბრენდის შეცვლაც, ვფიქრობ, საინტერესოა. ჩემი პროექტების მიმართ ემოციებიც მიჩნდება.

სოციალური მიმართულებიდან არ შემიძლია არ აღვნიშნო ფონდი „სიცოცხლის ხე“, რომლის ფარგლებში გაკეთებულმა საქმეებმა ბევრი ადამიანის ცხოვრება შეცვალა.

-რა არის საჭირო იმისთვის, რომ თქვენს სფეროში ადამიანი იყოს წარმატებული? გარდა ცოდნისა, განსაკუთრებული თვისებები თუ არის საჭირო.

ჩემი აზრით, კომუნიკაციის სფეროში მომუშავე ადამიანებისათვის აუცილებელია შემოქმედებითი აზროვნება, შრომისმოყვარეობა, მუდმივი სწრაფვა ინოვაციებისკენ. იმისათვის რომ იყო წარმატებული, მუდმივად უნდა გედო ხელი მომხმარებლის პულსზე, რათა ზუსტად გრძნობდე, რა უნდა შენს მომხმარებელს. უნდა გიყვარდეს ადამიანები, მიუხედავად მათი მსოფლხედველობისა თუ სხვა მახასიათებლებისა.

-დღეს საქართველოში შესაძლებელია თუ არა PR-ის   კარგად სწავლა, თუ მაინც  საერთაშორისო ცოდნა და გამოცდილებაა აუცილებელი?

ილიას სახელმწიფო უნივერსიტეტში პიარის მაგისტრატურა ნამდვილად ინოვაციური პროგრამაა. ვფიქრობ, მათ, ვისაც უნდა პიარის მიმართულებით საქართველოში თუ საზღვარგარეთ არსებული ცოდნა მიიღოს, კარგი პლატფორმაა. საზღვარგარეთ ცხოვრებას კიდევ სხვა უპირატესობები აქვს. საზღვარგარეთ სწავლით არამარტო კონკრეტული დარგი ვისწავლე, არამედ სხვანაირ ცხოვრებასაც შევეჩვიე და პიროვნულად განვითარდი.

-რამდენად ადვილად შეგიძლიათ  კრიზისული სიტუაციის განმუხტვა და გადაწყვეტილების მიღება და მსგავსი შემთხვევა ხომ არ მოქმედებს ხოლმე საქმის ხარისხზე?

ამ თემაზე ბევრი მაქვს ნაფიქრი. ჩემი პირველი წიგნიც ამ მიმართულებით გამოვეცი და მიმაჩნია, რომ კრიზისის დროს ყველაზე მნიშვნელოვანი დაგეგმარებაა. თუ სწორად გეგმავ, ხარისხსზე ეს არ აისახება.

-საინტერესო ეპიზოდი თქვენი ცხოვრებდან(საქმიანი), რომელმაც შეცვალა თქვენი ცხოვრება?

როდესაც გერმანიაში უნივერსიტეტი დავამთავრე, ბევრს ვფიქრობდი, სად გავაგრძელებდი ცხოვრებას. მე საქართველო ავირჩიე. 2005 წელი იყო და საქართველოში ბევრი რამ იცვლებოდა. ჩემმა საქართველოში დაბრუნებამ მკვეთრად გადაწყვიტა ჩემი ამჟამინდელი ცხოვრების სტილი და რიტმი. ძალიან კმაყოფილი ვარ, რომ ეს გადაწყვეტილება მივიღე.

–რომ არა ეს პროფესია, ვინ იქნებოდით, სად ხედავთ საკუთარ თავს?

ბავშვობაში ძალიან მომწონდა ორი პროფესია: მასწავლებლობა და პილოტობა. მასწავლებელი დავდექი – მუდმივად ტრენინგებს ვატარებ და საუნივერსიტეტო სწავლების პროცესშიც ვარ ჩართული. რომ არა ეს პროფესია, ალბათ პილოტი გავხდებოდი .

–რა არის თქვენი, როგორც საქმიანი ადამიანის ძლიერი მხარე და თვისებები?

ჩემი აზრით, ჩემი ყველაზე ძლიერი პიროვნული მხარე ჩემი დისციპლინა, კონცენტრაციის უნარი და მოთმინებაა. ასევე ძალიან მიყვარს სწავლა და ბევრ დროს ვუთმობ სიახლეების შემეცნებას. მგონია, რომ ჩემმა მრავალფეროვანმა დაკავებულმა ცხოვრებამ კარგი დაგეგმარების უნარი შემძინა და კარგად ვგეგმავ.

–რას გაძლევთ ის კომპანია, რომელშიც მუშაობთ? რით არის ის თქვენთვის საინტერესო?

ჩემთვის მნიშნელოვანია პიროვნული განვითარება და იდეების განხორციელების შესაძლებლობა. ასევე მნიშვნელობა აქვს პიროვნულ ურთიერთობებსაც. კომპანიები, რომლებთანაც მე ვთანამშრომლობ ასეთ შესაძლებლობებს მაძლევენ და სიამოვნებით ვთანამშრომლობ მათთან.

–სად ხედავთ თქვენს თავს 20 წლის შემდეგ?

20 წლის შემდეგ მინდა ვაკეთებდეს იმას, რასაც ვაკეთებ დღეს. მინდა ვასწავლიდე ისევ და ვმუშაობდე კომუნიკაციის სფეროში.  ამ დროს ვიქნები რამდენიმე წიგნის ავტორიც, რომელიც კომუნიკაციის თემებზე იქნება გამოცემული.

ინტერვიუ შსს–ს დაცვის პოლიციის დეპარტამენტის საზოგადოებასთან ურთიერთობისა და მარკეტინგის სამსახურის უფროს ტატა ხვედელიანთან

-რომელ მედია საშუალებებს ადევნებთ თვალყურს ყოველდღიურად?

საზოგადოებასთან ურთიერთობის სპეციალისტის პროფესია  მაღალ ჩართულობას და სიახლეების მუდმივ გაცნობას მოითხოვს, ამიტომაც დილას მასმედიის ყველა საშუალების გაცნობით ვიწყებ. პირველ რიგში, ვეძებ სიახლეებს, რომლებიც ჩემს სამუშაო სფეროს კვეთს ან მნიშვნელოვანი და  საინტერესო ინფორმაციის მომცემია. თვალყურს ვადევნებ, როგორც ბეჭდურ და სოციალურ მედიას, ასევე რადიოსა და სატელევიზიო არხებს.

-რა განსხვავებაა პიარსა და რეკლამას შორის?

პიარი გახლავთ საზოგადოებასთან ურთიერთობა, ეს არის სტრატეგიული კომუნიკაციის პროცესი. ჩვენ ვაცნობთ საზოგადოებას ამა თუ იმ პროდუქტს კომუნიკაციით და სხვადასხვაგვარი საშუალებებით , რომლებიც მიმართულია ცნობადობის ამაღლებისკენ და ჩვენი სიახლეების ფართო მასებისთვის გაცნობისკენ.

რეკლამა კი არის ერთ-ერთი ხერხი, გადაიხადო თანხა და  ამ გზით შეატყობინო საზოგადოებას შენს შესახებ.

საჯარო უწყებებების საქმიანობა დღესდღეობით მთლიანად აწყობილია საზოგადოებასთან ურთიერთობაზე. აუცილებელია, ადამიანებთან სწორი კომუნიკაცია, რათა თავიდან ავირიდოთ პიარ აქტივობის არასწორი ან უარყოფითი გაგება.

-დაასახელეთ თქვენი საუკეთესო პროექტი ან პერიოდი, რომლითაც ამაყობთ?

ყველაზე კარგად მახსენდება ჩემი შეხება შეზღუდული შესაძლებლობის მქონე პირთა საზოგადოებაში ინკლუზიის პროგრამასთან. ვფიქრობ, ამ პროექტებში ჩართულობამ განაპირობა ჩემი პროფესიული ზრდა და დიდი გამოცდილების მიღება. საზოგადოების ამ ნაწილთან კომუნიკაცია გავრცელებული სტიგმის გამო თავიდან ძალიან რთული მეგონა, მაგრამ შევძელი მათთან ურთიერთობის დამყარება.

ახლა  შემიძლია ვთქვა, რომ დღესდღეობით მყავს უამრავი შეზღუდული შესაძლებლობის მქონე  მეგობარი, ვფლობ ჟესტურ ენას და ერთხელ და სამუდამოდ ვთქვი უარი განსხვავებებზე.

-როგორ ახდენთ სოციალური მედიისა და პიარის ინტეგრაციას?

ვთვლი, რომ სოციალურ მედიას დღესდღეობით ერთ-ერთი მნიშვნელოვანი ადგილი უკავია საზოგადოებასთან ურთიერთობის სფეროში. მას ფართოდ ვიყენებთ სხვადასხვა სიახლის დასაანონსებლად და ასევე საზოგადოებივი აზრის შესაქმნელად.

-რას გააკეთებთ თუ კლიენტი ან მენეჯერი შეეწინააღმდეგება თქვენს პიარ სტრატეგიას?

საზოგადოებასთან ურთიერთობის სპეციალისტის პროფესია დღითიდღე უფრო აქტუალური ხდება. შესაბამისად, ამ სფეროს მცოდნე სპეციალისტებზე მოთხოვნა სტაბილურად იზრდება. უდიდეს მნიშვნელობას ვანიჭებ ნდობას, როდესაც ვმუშაობ ძალიან მჭირდება, რომ ჩემი ხელმძღვანელი მენდობოდეს და სჯეროდეს ჩემი ქმედებების. ამიტომაც, თუ კლიენტი ან მენეჯერი შეეწინააღმდეგება ჩემს მიერ დაგეგმილ სტრატეგიას, შევეცდები ავუხსნა სტრატეგიის საჭიროება და დავარწმუნო მის ეფექტურობაში.

-გაგვიზიარეთ თქვენი გამოცდილება უარყოფით მედია შემოტევაზე, რომელსაც გამკლავებიხართ

როდესაც მუშაობ საზოგადოებასთან ურთიერთობის სამსახურში, მუდმივად მზად უნდა იყო ნებისმიერი გამოწვევისთვის. ვფიქრობ, ყველა პიარ სპეციალისტს ჰქონია უარყოფითი მედია შემოტევა. ჩემს შემთხვევაში, ისევ საზოგადოებასთან ურთერთობითა და სწორი კომუნიკაციით გამოსწორდა ეს ამბავი.

-რა არის ყველაზე საინტერესო პიარ სფეროში მუშაობაში. რას გააუმჯობესებდით?

ძალიან მომწონს ეს სფერო და მასში კარგად ვგრძნობ თავს. ჩემთვის  ყველაზე საინტერესო არის კომუნიკაცია, რომელსაც დიდ მნიშვნელობას ვანიჭებ და ძალიან მომწონს ხალხთან ურთიერთობა. ასევე სწორად დაგეგმილი პიარ სტრატეგიის შედეგი. გავაუმჯობესებდი ხელმძღვანელობის მიდგომას პიარისადმი, რადგან ეს ძალიან მრავლისმომცველი სფეროა, სტრატეგიული და არ არის სწორი მასში მხოლოდ რამოდენიმე მიმართულების გამოყოფა და მხოლოდ მათი დახმარებით მუშაობა.