მარიამ მაღულარია: „აუცილებელია, იყო ღია, კომუნიკაბელური და გიყვარდეს ის საქმე, რომელსაც აკეთებ“

ინტერვიუ  კავკასიის უნივერსიტეტის საზოგადოებასთან ურთიერთობის მენეჯერ მარიამ მაღულარიასთან.

-რატომ გადაწყვიტეთ ამ სფეროში საქმიანობა და რა შესაძლებლობებს იძლევა, პიარი კარიერული ზრდის თვალსაზრისით?

-ეს თავისთავად მოხდა, გამომდინარე იქიდან რომ საინფორმაციო სამსახურში ჟურნალისტად ვმუშაობდი, სტატიებსაც ვწერდი და საზოგადოებას ინფორმაციას ვაწვდიდი, ადამიანებთან კომუნიკაცია ჩემთვის საყვარელ საქმედ იქცა. პიარი გაძლევს საშუალებას შენი კომპანიის მუშაობის დინამიკა და სიახლეები საზოგადოებას გააცნო, ამისთვის დღეს უკვე ბევრი პლატფორმა გვაქვს, რაც ცხადია, გულისხმობს იმას, რომ ჩვენი, პიარ მენეჯერების შესაძლებლობები იზრდება. კარიერული წინსვლაა, ისიც როცა შენი საქმე გიყვარს და ცდილობ სიახლეებს არასდროს ჩამორჩე.  ეს ზუსტად ჩემი საქმეა, ის არის რისი კეთებაც ყოველთვის მინდოდა.

რა არის საჭირო საზოგადოებასთან, წარმატებული კომუნიკაციის ჩამოსაყალიბებლად?

-იმ უნარების სწორად ცოდნა, რომლებიც აუცილებელია კომუნიკაციის სწორად წარმართვისთვის. კარგი გუნდი, რომელიც შენთან ერთად შრომობს ორგანიზაციის, კომპანიის, ჩვენს შემთხვევაში უნივერსიტეტის პოპულარიზაციისთვის.

– 3 რჩევა, რომელსაც მისცდემდით მას ვისაც ამ სფეროში მოღვაწეობა სურს.

-რთულია რჩევის მიცემა, რადგან ეს ყველაფერი გამოცდილების მიღების შემდეგ მოდის, თუმცა ვიცი, აუცილებელია, იყო ხელმისაწვდომი/ღია, კომუნიკაბელური და ყველაზე მნიშვნელოვანი გიყვარდეს ის საქმე, რომელსაც აკეთებ, დავრწმუნდი, რომ სხვაგვარად არაფერი გამოდის.

-რის ცოდნის ქონას ისურვებდით კარიერის დაწყებამდე პიარის სფეროში?

-ჟურნალისტობისას საზოგადოებასთან ურთიერთობის მენეჯერებთან ხშირად ვკონტაქტობდი, დაახლოებით ვხვდებოდი მათი მუშაობის სპეციფიკას, თუმცა, მხოლოდ რელიზის მომზადება, რესპონდენტის შეთანხმება და კითხვებზე პასუხი არ არის ჩვენი საქმე, დღეს ვხვდები რომ გაცილებით შრომატევადი საქმეა, ვიდრე მეგონა. არ მაქვს პასუხი რისი ცოდნა მინდოდა კარიერის დაწყებამდე, სულ ვცდილობ ვისწავლო, მუდმივად, რადგან პიარი ძალიან ცოცხალი, აქტიური სფეროა.

როგორია თქვენი ტიპიური სამუშაო კვირა?

-მუდმივად ვმუშაობთ. მარკეტინგისა და პიარის დეპარტამენტი აქტიურადაა ჩართული უნივერსიტეტის ცხოვრებაში და მნიშვნელოვან პროცესებში. კვირის განმავლობაში ღონისძიებების დაგეგმვა, სოციალური არხებისა და მედიის მონიტორინგი, თანამშრომლებთან, სტუდენტებთან კომუნიკაცია და სხვა. განათლების სფერო საინტერესოა, როცა კავკასიის უნივერსიტეტში მუშაობ მრავალფეროვანი სამუშაო გარემო გარანტირებული გაქვს. 

-რა გზები მიგაჩნიათ საუკეთესოდ კონტაქტების და წყაროების მოსაპოვებლად?

-საზოგადოებასთან ურთიერთობა პირდაპირ პასუხობს ამ კითხვას, ურთიერთობით, კომუნიკაციით, კონტაქტით. ვგულისხმობ, ინფორმაციის მიწოდებით მეორე მხარის კმაყოფილებას. თუმცა ეს ინდივიდუალურია, მნიშვნელოვანია კონკრეტული შემთხვევების გათვალისწინება.

-როგორ იწყებთ სამუშაო დღეს?

-ძველი ჩვევაა, გაღვიძებისთანავე გავეცნო სიახლეებს, უფრო ფართოდ ვიდრე კონკრეტული სფეროა, გავიგო რა ხდება, რადგან ყველა ინფორმაცია ახდენს გავლენას ამ პოზიციაზე მუშაობისას დღისა და კვირის დაგეგმვაში. არ მაქვს განსაკუთრებული რიტუალი, არც სტანდარტული პასუხი, მაგალითად: ყავით ვიწყებ დღეს😊 თუმცა, სასურველია, ნიუსების გაცნობისას, მეილის შემოწმებისას, დაგეგმილი დღის გადახედვისას მქონდეს კარგი განწყობა, რასაც დილიდან ვცდილობ.

რა უნარებია საჭირო წარმატებული პიარ მენეჯერისთვის?

-კიდევ ერთხელ აღვნიშნავ, აუცილებელია იყო ინფორმირებული, იცოდე რა ხდება სამსახურში, შენს სფეროში, მედიაში და ა.შ არ უნდა ჩამორჩე, „პულსზე უნდა გედოს ხელი“ იყო ცნობისმოყვარე. გაიზიარო და მიიღო სხვათა შეხედულბებიც. იცოდე სწორი მესიჯების მიწოდება და კითხვები სწორად დასმა. მუდმივად იყო ხელმისაწვდომი, რადგან არასდროს იცი როდის იქნები საჭირო, როგორც შუამავალი.

რა თვისებებს აფასებთ ადამიანებში, სამუშაო გარემოში?  

-სამართლიანობას, ობიექტურობას. სამუშაო გარემოში ამასთან ერთად, ყველაზე მნიშვნელოვანი გუნდურობაა.

– რა არის საუკეთესო პიარ პრაქტიკა რომელსაც ტექნოლოგია ვერ შეცვლის?

საზოგადოებასთან ურთიერთობის სფერო იზრდება, მომიჯნავე სფეროების: მარკეტინგის, გაყიდვების, რეკლამის, სოციალური მედიის (როგორც პლატფორმის) და სხვა საკომუნიკაციო რგოლების, რიგ შემთხვევებში შერწყმის მიუხედავად, მნიშვნელოვანია შენი რეპუტაცია, შენდამი სანდოობის მაჩვენებელიც მაღალი იყოს. ამას ტექნოლოგიები ვერ ჩაანაცვლებს.

– რა ტრენდები და ინოვაციები იკვეთება საზოგადოებასთან ურთიერთობის სფეროში?

-ამბავს ისევ რელიზებით ვავრცლებთ, ვურეკავთ პროდიუსერებს, ვატყობინებთ საინფორმაციო სააგენტოების ხელმძღვანელებს, სხვადასხვა მედიასაშულების ჟურნალისტებს.. მაგრამ საკომუნიკაციო არხებით მესიჯების მიწოდება მარტივდება, უფრო ხელმისაწვდომი ხდება და ჩვენც ახალი მიდგომების შემუშვება გვიწევს.

ანა ჩხაიძე: ამ სფეროში კრეატიულობა ყოველთვის ფასდებოდა და დღესაც უმნიშვნელოვანესია

ინტერვიუ World Vision South Caucasus-ის კომუნიკაციების დირექტორ ანა ჩხაიძესთან

-რატომ გადაწყვიტეთ ამ სფეროში საქმიანობა და რა შესაძლებლობებს იძლევა, პიარი კარიერული ზრდის თვალსაზრისით?

პროფესიით ჟურნალისტი ვარ, რამდენიმე წლიანი ჟურნალისტური საქმიანობის შემდეგ მუშაობა დავიწყე World Vision- ში კომუნიკაციების სპეციალისტად. განვითარების სფეროში მუშაობა იმდენად საინტერესო აღმოჩნდა, რომ უკვე 10 წელია ამ ორგანიზაციაში ვმუშაობ და ძალიან მიხარია, რომ თანამონაწილე ვარ იმ დადებითი პროცესების, რასაც ეს ორგანიზაცია წლების მანძილზე ემსახურება. ბევრი ადამიანის ცხოვრების გაუმჯობესებაში შეგვიტანია წვლილი და მრავალი პოზიტიური ცვლილების უშუალო მონაწილე ვყოფილვართ. კონკრეტული ადამიანების ისტორიების, პრობლემებისა თუ წარმატებების გაზიარება წლებია ჩემი საქმიანობაა. დროთა განმავლობაში აუდიტორიასთან წვდომის ხერხები იცვლება, სოციალურმა ქსელებმა ბევრად უფრო საინტერესო და ინტენსიური გახადა ამ სფეროში მუშაობა.

რა არის საჭირო საზოგადოებასთან, წარმატებული კომუნიკაციის ჩამოსაყალიბებლად?

პირველ რიგში, უმნიშვნელოვანესია იცოდე თუ რა არის შენი მიზანი, რა მესიჯი გინდა მიიტანო საზოგადოებამდე. ამის შემდეგ იწყება ეფექტური გზების ძიება აუდიტორიასთან კავშირის დასამყარებლად – ამ ეტაპზე ძალიან მნიშვნელოვანია კრეატიულობა  და ასევე საკუთარი აუდიტორიის ცოდნა. საკმაოდ კომპლექსური საკითხია უმნიშვნელოვანესია ამ დროს მედიის თანადგომა, მათი დაინტერესება საკითხით.

ამ სფეროში ბევრი რამ იცვლება, ამიტომ მნიშვნელოვანია მიყვებოდე სიახლეებს, იცნობდე საკუთარ აუდიტორიას.

როგორია თქვენი ტიპიური სამუშაო კვირა?

იმის მიხედვით, თუ რამდენად აქტიური პროცესები მიმდინარეობს ორგანიზაციაში, განსხვავდება ჩემი სამუშაო კვირაც. ამჟამად ვცდილობთ ქუჩაში მცხოვრები და მომუშავე ბავშვების შესახებ ცნობიერების ამაღლებას და მათ მიმართ საზოგადოების დამოკიდებულების შეცვლას. კამპანიით #ესარარისჩემიარჩევანი #NotMyChoice გვსურს საზოგადოებას დავანახოთ მათი პრობლემები და ასევე ვაჩვენოთ, რომ შესაძლებელია მათ ცხოვრების შეცვლა. შესაბამისად ჩემი საქმიანობა ამ ეტაპზე მოითხოვს აქტიურ მუშაობას სოციალურ ქსელებში და მედიის ჩართულობაზე ზრუნვას.

რა უნარებია საჭირო წარმატებული პიარ მენეჯერისთვის?

პირველ რიგში, სტრატეგიულად აზროვნება, აუცილებელია გაიაზრო იმ ორგანიზაციის მიზნები და მოთხოვნები, სადაც მუშაობ. ამ სფეროში კრეატიულობა ყოველთვის ფასდებოდა და დღესაც უმნიშვნელოვანესია. ასევე ძალიან მნიშვნელოვანია გიყვარდეს ის საქმე, რასაც აკეთებ და თემები, რაზეც მუშაობ. კონკრეტული ინიციატივის წარმატებით განსახორციელებლად საჭიროა გუნდური მუშაობა, გუნდის თითოეული წევრის ძლიერი მხარეების დანახვა და მათი პროფესიული ზრდის ხელშეწყობა.

რა ტრენდები და ინოვაციები იკვეთება საზოგადოებასთან ურთიერთობის სფეროში?

ტრადიციული მედია საშუალებები ხშირ შემთხვევაში ჩაანაცვლა სოციალურმა არხებმა, რაც ყველასთვის ხელმისაწვდომია და შესაბამისად ინფორმაციის ნაკადიც დიდია. ბევრად დაჩქარდა პროცესები, სოციალური მედია თავის წესებს გთავაზობს და აუცილებელია მუდმივად აყვე სიახლეებს. აუდიტორიასთან ცალმხრივი ურთიერთობა არ გაქვს, მუდმივ ინტერაქციაში ხარ მასთან, გაქვს შესაძლებლობა დააკვირდე მათ რეაქციებს რა შინაარსის მასალა იწვევს მათ მოწონებას, განსაზღვრო მათი ასაკობრივი ჯგუფი და შესაბამისად უფრო ეფექტურად მიაწოდო ინფორმაცია.

გაიზარდა მოთხოვნა კვლევებზე დაფუძნებულ ინფორმაციაზე. ასევე ბევრად გაიზარდა მოთხოვნა ისტორიის ვიზუალურად გადმოცემაზე ( visual storytelling).  

ვიქტორია ჟიჟკო: ჩემთვის პიარ სფერო უამრავი შესაძლებლობების ნაკადი, მუდმივი სიახლე, ინოვაცია, საინტერესო პროექტები და კრეატიულობაა

ინტერვიუ კომპანია ქართულ-ჰოლანდიური ჰოსპიტალის მარკეტინგის სამსახურის უფროსთან, ვიქტორია ჟიჟკოსთან.

-რომელ პიარ კომპანიები შთაგაგონებენ?

-დღეს დღეობით მსოფლიოს მასშტაბით ბევრი წარმატებული პიარ სააგენტოა, თუმცა განსაკუთრებით განოვყოფდი Ketchum-ს, რომელსაც თითქმის 100 წლიანი წარმატებული ისტორია აქვს და ბევრი ინოვაციური პროდუქტი აქვს  შექმნილი. ასევე აქვს ძლიერი კრიზისული მენეჯმენტი, რაც შემდგომში გამოიხატა მათი არაერთგზის თანამშრომლობით ამერიკის და შემდგომ რუსეთის მთავრობასთან. როგორც ვიცი რეკორდსმენიც კი არის – ყველაზე მეტი კანის ლომი აქვს მოგებული მიმდინარე წელს.

-მედია საშუალებებს ადევნებთ თვალყურს ყოველდღიურად?

-რადგანაც ჩემი სამუშაო გრაფიკი ფაქტობრივად 24/7-ზეა დღევანდელ პირობებში ყველაზე ოპტიმალური საშუალება ჩემი აზრით,  მაინც ინტერნეტია.  მასში გაერთიანებულია ტელევიზიაც, ბეჭდური მედიაც, სოციალური მედიაც და შესაბამისად ინფორმაციის მიღებაც წამებშია შესაძლებელი. მუდმივად ხაზზე და მოვლენების ეპიცენტრში ხარ.

– რა განსხვავებაა პიარსა და რეკლამას შორის?

-ერთ-ერთი ყველაზე ხშირად დასმული კითხვა  თუმცა საკმაოდ ლეგიტიმური ჩემი აზრით საქართველოს რეალობაში. სინამდვილეში, პიარსა და რეკლამას შორის უდიდესი სხვაობაა. პიარი გრძელვადიანი პროცესია, რომლის დროსაც ცდილობ შეიქმნა დადებითი, ან ზოგ შემთხვევაში უარყოფითი იმიჯი, რეპუტაცია და დამოკიდებული ხარ მედია საშუალებებზე. ამ შემთხვევაში არ ვსაუბრობ შეკვეთილ სტატიებზე რომლებიც რეკლამაა, მაგრამ პიარი ხშირად ეშლებათ ხოლმე, მთავარია სოციუმის დამოუკიდებელი გამოხმაურება და ფიდბექი, შენ მხოლოდ ეხმარები აზრის ჩამოყალიბებაში. მოკლედ, პიარი წარმოადგენს დაგეგმილ და უწყვეტ ძალისხმევას, რომელიც მიმართულია ორგანიზაციასა და საზოგადოებას შორის კეთილსასურველი ურთიერთობების და ურთიერთგაგების ჩამოყალიბებაზე და შენარჩუნებაზე

რეკლამის შემთხვევაში კი პირიქითაა. იხდი მედია სივრცის და დროის თანხას, გადიხარ კონკრეტულ სეგმენტზე, რომელსაც თავად ირჩევ.  ეს არის სიახლის და მესიჯების მასმედიაში განთავსების კონტროლირებადი მეთოდი.

როგორ ახდენთ სოციალური მედიისა და პიარის ინტეგრაციას?

-სოციალური მედია პიარის ეერთ ერთი უმნიშვნელოვანესი ელემენტია. ის თავიდანვე ინტეგრირებულია პიართან და ყოველ დღიური, ყოველწუთობრივი შეხებაც კი აქვს. საქართველოში სოციალური მედია ერთ-ერთი ყველაზე განვითარებული სფეროა, შესაბამისად ყველაზე გამოყენებადი პიარ საქმიანობისთვის, პიარ კამპანიების დასაანონსებლად, ან თუნდაც უშუალოდ სოციალური მედიის გამოყენებით შექმნილი პიარ კამპანიებისთვის.

როგორ უმკლავდებით პიარ კრიზისულ მდგომარეობას კომპანიაში?

-კრიზისული პიარის მენეჯმენტი დროს ხდება იმ მოსალოდნელი კრიზისული სიტუაციების დროული იდენტიფიცირება, შეფასება და მოქმედება, რომელსაც შეიძლება პირდაპირი გავლენა ჰქონდეს ორგანიზაციაზე, მის იმიჯზე, მომხმარებელთან ურთიერთობასა და სხვა არანაკლებ მნიშვნელოვან ფაქტორებზე. ამიტომ საჭიროა მუდმივად იყო კონცენტრირებული ყველა დეტალზე, წინასწარ განსაზღვრო შესაძლო ფიდბექი და იყო მზად კონსტრუქციული კრიტიკისათვის. მნიშვნელოვანი ფაქტორია აღიარო და სწრაფად გამოასწორო საკუთარი შეცდომები, იყო მშვიდი და ორგანიზებული, რათა სწორედ მიმართო საკუთარი ძალები პრობლემის აღმოფხვრისათვის.

რა არის ყველაზე საინტერესო პიარ სფეროში მუშაობაში. რას გააუმჯობესებდით?

-ჩემთვის პიარ სფერო არის უამრავი შესაძლებლობების ნაკადი, მუდმივი სიახლე, ინოვაცია, საინტერესო პროექტები, ბევრი ბრეინსთორმინგი და კრეატიულობა. გავაუმჯობესებდი პიარ სფეროზე ინფორმირებულობას საქართველოში. სამწუხაროდ დღემდე ბევრი ვერ არჩევს მარკეტინგს, პიარს, რეკლამას, არის გარკვეული პრობლემები ცნობიერებასთან დაკავშირებით, თუმცა საბედნიეროდ ნელ ნელა მცირდება და პიარიც თავისი დანიშნულების კალაპოტში დგება.

თეონა ახობაძე:PR და მარკეტინგი ცოცხალი ორგანიზმივით არის, რომელიც გამუდმებით პულსირებს

ინტერვიუ სასტუმრო რედისონის პიარისა და მარკეტინგის მენეჯერ თეონა ახობაძესთან

რატომ გადაწყვიტეთ ამ სფეროში საქმიანობა და რა შესაძლებლობებს იძლევა, პიარი და მარკეტინგი  კარიერული ზრდის თვალსაზრისით?

-ამ ეტაპზე მარკეტინგის და კომუნიკაციების მენეჯერის პოზიციას ვიკავებ. საერთოდ, პროფესიით ტელე-რადიო ჟურნალისტი ვარ. წლების მანძილზე სწორედ ამ განხრით ვმუშაობდი. ასე რომ, კომუნიკაციის სფეროსთან და მედიასთან კავშირი ყოველთვის მქონდა. უცნაურია, მაგრამ ისე მოხდა, რომ ჩემი პირველივე სამსახური სწორედ PR-ით დაიწყო. ეს იყო სტაჟირება ევროინტეგრაციის სამინისტროს საზოგადოებასთან ურთიერთობის დეპარტამენტში. ამის შემდეგ წლების მანძილზე ვმუშაობდი სხვადასხვა მედია საშუალებებში კორესპონდენტად. ყველაზე დიდი ხანი ვიმუშავე „რუსთავი 2“-ში, სადაც  გადაცემა „დილა მშვიდობისა საქართველო“-ში  თითქმის ექვსი წელი, არაჩვეულებრივ გუნდთან ერთად, გავატარე. ამ სამსახურმა პროფესიულ ზრდასთან ერთად გაცილებით მეტი, გუნდში მუშაობა მასწავლა. რაღაც ეტაპზე გავაცნობიერე, რომ მოვიდა განვითარების დრო და დიდ ბრიტანეთში სასწავლებლად გავემგზავრე, სადაც სწორედ PR-ს და ბრენდინგს ვსწავლობდი.

რაც შეეხება კარიერული ზრდის შესაძლებლობებს, ვფიქრობ, განვითარების საშუალებას ნებისმიერი სფერო იძლევა, სადაც არ უნდა მუშაობდე. დამოკიდებულია მხოლოდ იმაზე თუ რა მიდგომა გაქვს შენ საკუთარი საქმის მიმართ. 

რა არის საჭირო საზოგადოებასთან, წარმატებული კომუნიკაციის ჩამოსაყალიბებლად?

-პასუხი კითხვაშივე ჩანს, ეს კომუნიკაციაა, რაც მარტივად, ურთიერთობას ნიშნავს.   მთავარი ადამიანური ურთიერთობების ჩამოყალიბებაა. ეს კი, არც თუ ისე იოლია. იმის გათვალისწინებით, რომ ჩვენ ყველანი განსხვავებულები ვართ მსოფლმხედველობის, ქცევის, ემოციის, აღქმის და სხვა მრავალი ასპექტის თვალსაზრისით. ვფიქრობ, მთავარია გქონდეს უნარი დაამყარო ბუნებრივი და, ამავდროულად, საქმიანი ურთიერთობა სრულიად განსხვავებულ ადამიანებთან, ესაუბრო მათ გასაგებ ენაზე და იყო გულწრფელი. მარკეტინგისა და PR-ის ძალიან სწრაფი განვითარების შესაბამისად ვითარდება მომხმარებლის ცნობიერებაც, დღეს „დაბალი ფასები, მაღალი ხარისხი“-ს უკვე არავის სჯერა, ამიტომ გულახდილობა აუცილებელია. და რაც ყველაზე მნიშვნელოვანია უნდა მოუსმინო მომხარებელს და სწორედ გაიაზრო მათი მიზანი.

3 რჩევა, რომელსაც მისცდემდით მას ვისაც ამ სფეროში მოღვაწეობა სურს.

-არ ვთვლი, რომ მე ვარ ის, ვინც რჩევები უნდა დაარიგოს, თუმცა, ვფიქრობ, არამარტო ამ სფეროში, არამედ ნებისმიერი დარგის სპეციალისტისთვის მნიშვნელოვანია  არასოდეს შეწყვიტო სწავლა და არ გაგიჩნდეს იმის შეგრძნება, რომ ისეთი დონის პროფესიონალი ხარ და სხვების რჩევას არ საჭიროებ, არასოდეს მოგერიდოს იმის აღიარება, რომ რაღაც არ იცი, მითუმეტეს კომუნიკაციის სფეროში. PR და მარკეტინგი ცოცხალი ორგანიზმივით არის, რომელიც გამუდმებით პულსირებს, ყოველდღიურად იცვლება და ვითარდება, სულ უნდა  ეცადო არ ჩამორჩე ტემპს. არ უნდა ითაკილო შრომა, ნებისმიერი სამუშაო იძლევა გამოცდილებას, რომელიც მომავალში აუცილებლად გამოგადგება და ბოლოს,  უნდა ეცადო იყო გაბედული, არ შეგეშინდეს შეცდომების დაშვების.

– რის ცოდნის ქონას ისურვებდით კარიერის დაწყებამდე პიარის სფეროში?

-ვისურვებდი რომ მეტი უცხო ენა ვიცოდე, ვფიქრობ, დღეს ორი ენის ცოდნა საკმარისი არ არის.  სულ ვნანობ, რომ ფრანგული ენის სწავლა შევწყვიტე. ვფიქრობ, კომუნიკაციის სფეროში ძალიან კარგია, როდესაც ადამიანებს მათ ენაზე ესაუბრები.  ეს ურთიერთობას გაცილებით მარტივს ხდის. იმედია მაქვს, გამოვნახავ დროს და გავაგრძელებ სწავლას.

როგორია თქვენი ტიპიური სამუშაო კვირა?

ტიპიური კვირები ჩემს სამსახურში თითქმის არ არის. ჩვენი კომპანიის სპეციფიკიდან გამომდინარე გვიწევს პარალელურად სხვადასხვა პროექტებზე მუშაობა, შესაბამისად სამუშაო დინამიკაც განსხვავებულია.  

-რა გზები მიგაჩნიათ საუკეთესოდ კონტაქტების და წყაროების მოსაპოვებლად?  

-კონტაქტების მოსაპოვებლად ალბათ იდეალური ვარიანტი პირისპირ ურთიერთობაა, თუმცა დღეს ეს თითქმის შეუძლებელია აჩქარებული და დატვირთული ცხოვრების ტემპის გამო. საბედნიეროდ ტექნოლოგიურმა განვითარებამ მოიტანა ბევრი საკომუნიკაციო არხი, რომელიც პირდაპირ კონტაქტების დაგროვებაზეა ორიენტირებული.

-როგორ იწყებთ სამუშაო დღეს?

-ჩემი სამუშაო დღე იწყება სტანდარტულად აუცილებელი ყავით. ამის შემდეგ დგება დღის გეგმა. ეს ჩვევა ბოლო წლებია გამოვიმუშავე და ძალიან მეხმარება ორგანიზებაში. რა თქმა უნდა, ხშირად მიწევს მიმდინარე საქმეების ჩანაცვლება პრიორიტეტების მიხედვით, თუმცა საერთო ჯამში, მაინც ვცდილობ მივყვე გეგმას და არ გადავდო საქმეები. 

რა უნარებია საჭირო წარმატებული პიარ მენეჯერისთვის?

-ჩემი აზრით, პირველ რიგში ყველაზე მნიშვნელოვანია შეგეძლოს ადამიანების მოსმენა. ამის შემდეგ ერთვება შენი პროფესიული თუ პიროვნული უნარ-ჩვევები. კომუნიკაციის დაწყებამდე უნდა გქონდეს ზუსტი სურათი თუ რას გეგმავ, გააზრებული მექანიკით და სასურველი შედეგით. ამის შემდეგ კი, იყენებ საკომუნიკაციო არხებს, რომელთა დახმარებითაც შენი სათქმელი მიგაქვს ადრესატამდე.

-რა თვისებებს აფასებთ ადამიანებში, სამუშაო გარემოში?  

-პასუხისმგებლობის გრძნობას, ამის გარეშე არ არსებობს ნდობა, ამ უკანასკნელის გარეშე კი, არ გამოდის თანამშრომლობა.  სხვისი შრომის პატივისცემის უნარს, თავმდაბლობას. ასევე ვაფასებ ადამიანებს, რომლებსაც საკუთარი შეცდომების დანახვის და აღიარების უნარი აქვთ. ძალიან მნიშვნელოვანია გუნდში მუშაობის უნარი.

-რა არის საუკეთესო პიარ პრაქტიკა რომელსაც ტექნოლოგია ვერ შეცვლის?

-ვფიქრობ, ტექნოლოგიური განვითარება PR-ის, ისევე როგორც მარკეტინგის, მუშაობის ფორმას ცვლის და არა შინაარს. იცვლება მხოლოდ კომუნიკაციის მეთოდიკა, რაც ციფრულ განვითარებას მოაქვს. მასიური სოციალური პლატფორმები (Facebook, Instagram, Twitter, LinkedIn და ა.შ) გვაძლევს სამიზნე აუდიტორიის სპეციფიკაციის საშუალებას, თუმცა ამოსავალი წერტილი მაინც შედეგია, რომელზეც ორიენტირებული ვართ. რაც შეეხება ხელშეუხებელ პრაქტიკას, როგორც კომუნიკაციის ხერხს, ვფიქრობ, ეს, ისევ და ისევ,  პირისპირ ურთიერთობაა.

-რა ტრენდები და ინოვაციები იკვეთება საზოგადოებასთან ურთიერთობის სფეროში?

რამდენიმე ტრენდს გამოვყოფდი, ერთ-ერთი კონტენტ მენეჯმენტია, რომელიც ძალიან მნიშვნელოვანი მიმართულებაა როგორც PR-ის და მარკეტინგის ახალი საკომუნიკაციო ინსტრუმენტი. აღსანიშნავია, რომ ბოლო დროს ეს ორი მიმართულება თითქმის მოიცავს კიდეც ერთმანეთს. დღეს მომხმარებელი ელოდება ამბავს, ისტორიას, რომელსაც ადამიანურ ენაზე მოუყვები. ასევე აღსანიშნავია, ვიზუალური კომუნიკაციაც, რომელიც ახალ საფეხურზე გადადის.  მოთხრობილ ან თუნდაც ტექსტუალურ ინფორმაციას ნელნელა ანაცვლებს ვიდეო, რომლის ყურების საშუალებაც უკვე რეალურ დროშია შესაძლებელი.  გასათვალისწინებელია ასევე კომუნიკაციის ტეროტორიის ზრდაც, რაც პროპორციულად დაკავშირებულია სოციალური მედია გიგანტების მასშტაბების ზრდასთან.  

ვალერი ფანცულაია: „საზოგადოებასთან ურთიერთობის უმთავრესი პრინციპი საზოგადოების ნდობის მოპოვებაა“

კავკასუს ბიზნეს ვიკის ინტერვიუ „თელასის“ საზოგადოებასთან ურთიერთობის დეპარტამენტის უფროს ვალერი ფანცულაიასთან

რატომ გადაწყვიტეთ ამ სფეროში საქმიანობა და რა შესაძლებლობებს იძლევა, პიარი კარიერული ზრდის თვალსაზრისით?

რა თქმა უნდა ძალიან საინტერესოა და ამასთან ერთად საპასუხისმგებლოც, თანამედროვე ტრენდებს ეცნობი, სულ საჭიროა სიახლეების შესწავლა, ამასთან ერთად ბევრი მუშაობა საკუთარ თავზე, ეს ყველაფერი კი ქმნის იმის საფუძველს , რომ იყო წარმატებული. ალბათ, არ არსებობს რაიმე კრიზისული სიტუაცია ან დაუძლეველი პრობლება, რომელსაც გამოცდილი პიარ სპეციალისტი ვერ დაძლევს.

არასდროს მიფიქრია თუ  რა შესაძლებლობას იძლევა პიარი კარიერული ზრდისთვის, რადგან შესაძლებლობებს ჩვენ თვითონ ვქმნით დასახული მიზნებით და განხორციელებული პროექტებით.

რა არის საჭირო საზოგადოებასთან, წარმატებული კომუნიკაციის ჩამოსაყალიბებლად?

წარმატებული კომუნიკაციისთვის აუცილებელია სწორი სტრატეგიის შემუშავება, რომელიც ეფუძნება არსებული სიტუაციის ანალიზს თუ რა სჭირდება საზოგადოებას, რას ელოდება ჩვენგან, შესაბამისი კომუნიკაციის გეგმის შემუშავება და საზოგადოებისთვის ძალიან მარტივ ენაზე მიწოდება. ამ დროს მნიშვნელოვანია, რომ კომუნიკაცია იყოს ადვილად აღქმადი და ყველასთვის გასაგები, მიუხედავად იმისა, რა საშუალებებს გამოვიყენებთ ამისთვის. მთავარია, ამ შემთხვევაში, საზოგადოების ნდობის და პოზიტიური განწყობის მოპოვება.

–რა არის საჭირო საზოგადოებასთან, წარმატებული კომუნიკაციის ჩამოსაყალიბებლად?

პირველი ის, რომ რაც შეიძლება მეტი ინფორამცია მოიპოვონ და კარგად გაეცნონ იმ სფეროს, რა სფეროშიც იქნებიან დასაქმებული, რადგან შენ თუ არ იცნობ კარგად კომპანიის საქმიანობას, სხვას ვერ უამბობ მის შესახებ. ასევე მნიშვნელოვანია გადაწყვეტილების მიმღებ ყველა პირთან უშუალო კონტაქტი და კავშირი.

მეორე, მედიასთან ურთიერთობისთვის კარგი კონტაქტების დამყარება. ასევე მნიშვნელოვანია შესაბამის ექსპერტებთან, არასამთავრობო სექტორის წარმომადგენლებთან კონტაქტები, რომლებსაც შეუძლიათ ზეგავლენა მოახდინონ საზოგადოებრივ აზრზე.  მესამე კი – არ შეუშინდნენ პრობლემებსა და გამოწვევებს.

– 3 რჩევა, რომელსაც მისცდემდით მას ვისაც ამ სფეროში მოღვაწეობა სურს.

პიარ სპეციალისტი  უნდა ფლობდეს ფსიქოლოგიის, სოციოლოგიის, პოლიტოლოგიის, სტრატეგიული მენეჯმენტის, მარკეტინგის, მედიასათან ურთიერთობის საფუძვლებს.

როგორია თქვენი ტიპიური სამუშაო კვირა?

სამუშაო კვირა  იწყება კვირის  გეგმის მიმოხილვით, შეხვედრებისა და აქტივობების მიხედვით. საერთოდ ერთი წლის გეგმა წინსაწარ გვაქვს შემუშავებული, რა თქმა უნდა, შეიძლება იყოს გაუთვალისწინებელი და დაუგეგმავი, კრიზისული სიტუაციაც, რომლის ეფექტიანი მართვა სწრაფად უნდა მოხდეს.

-რა გზები მიგაჩნიათ საუკეთესოდ კონტაქტების და წყაროების მოსაპოვებლად? 

პირადი შეხვედრები, სხვადასხვა ღონისძიებებში მონაწილება. ასევე ახალი პროექტების დაგეგმვა და განხორციელება, პიარისა და მარკეტინგის  სფეროში დასაქმებულ პროფესიანალებთან უშუალო შეხვედრები, აზრთა გაცვლისა და რჩევების გასათვალისწინებლად.

-როგორ იწყებთ სამუშაო დღეს?

დილით, სანამ სამსახურში მივალ ვეცნობი დღის სიახლეებს დილის გადაცემებისა და სოციალური მედიის საშუალებით. სამუშაო დღე იწყება შეხვედრით, თანამშრომლებთან მიმდინარე სამუშაოსა და გეგმებთან დაკავშირებით. შემდეგ ხდება თანამშრომლებისათვის დავალებების გადანაწილება.  მნიშვნელოვან დროს ვუთმობ შიდაკორპორატიულ ურთიერთობებს სხვადასხვა საკითხებზე.

–რა უნარებია საჭირო წარმატებული პიარ მენეჯერისთვის?

ბევრი მუშაობა საკუთარ თავზე, სტრატეგიული აზროვნება, კარგი კომუნიკაციის უნარი, უნდა სარგებლობდეს საზოგადოების ნდობით, სწრაფად და ეფექტიანად მართავდეს კრიზისულ სიტუაციას, გუნდური მუშაობის უნარი.

რა თვისებებს აფასებთ ადამიანებში, სამუშაო გარემოში? 

პროფესიონალიზმს, პუნქტუალობას, კრეატიულობას.

–რა არის საუკეთესო პიარ პრაქტიკა რომელსაც ტექნოლოგია ვერ შეცვლის?

ადამიანურ ფაქტორს ვერანაირი ტექნოლოგია ჩაანაცვლებს. დღეს ბევრს საუბრობენ ხელოვნური ინტელექტის შექმნაზე და ადამიანის რობოტით ჩანაცვლებაზე.  საზოგადოებასთან ურთიერთობის უმთავრესი პრინციპი არის საზოგადაოების ნდობის მოპოვება, რასაც ადამიანური ურთიერთობები განაპირობებს. თუმცა ყველაფერი შეიძლება მოხდეს, თუ ფანტასტიკურ ნაწარმოებებს დავუჯერებთ.

ციფრული ტექნოლოგიების განვითარებამ პიარზე  უდიდესი გავლენა მოახდინა; მივიღეთ მედიის ახალი სახე – სოციალური მედია, რომელიც სულ უფრო პოპულარული ხდება და უფრო ადვილს ხდის სხვადასხვა  სამიზნე ჯგუფეთან ურთიერთობას.  ვიზუალური სთორითელინგი სულ უფრო აქტიურად გამოიყემება პიარ კამპანიების დროს და ძალიან ეფექტიანი საშუალებაა. ასევე სოციალურმა მედიამ  წარმოშვა რეალურ დროში სწრაფი რეაგირების აუცილებლობა. ასე, რომ წარმატებული კამპანიების წარმართვისათვის დღეს კომპანიები უფრო ხშირად იყენებენ სოციალურ მედიას, რაც მომავალშიც გაგრძელდება.

ნიცა ჩოლოყაშვილი: „ყველაზე დიდი ადრენალინი ახალი წარმატებული პროექტია“

გთავაზობთ კავკასუს ბიზნეს ვიკის ინტერვიუს კომპანია „აიდიეს ბორჯომი საქართველოს“  საზოგადოებასთან ურთიერთობის სამსახურის ხელმძღვანელ ნიცა ჩოლოყაშვილთან  

-რატომ გადაწყვიტეთ ამ სფეროში საქმიანობა და რა შესაძლებლობებს იძლევა, პიარი კარიერული ზრდის თვალსაზრისით?

პროფესიით სოციოლოგი ვარ, თბილისის სახ. უნივერსიტეტი დავამთავრე, თუმცა, მეორე კურსიდან ტელევიზიაში მოვხვდი და 25 წლამდე აქტიურად ვიყავი ტელე-ჟურნალისტიკაში. ნიუსის რეპორტიორობა ერთგვარი ადრენალინია, რომელსაც რთულია შეელიო. მაგრამ, დადგა პერიოდი, როცა გადავწყვიტე, რომ ჩემთვის საინტერესო იქნებოდა ცოტა განსხვავებულად განვითარებულიყო ჩემი კარიერა. იმ პერიოდში , 2001-2002 წლებში ძალიან საინტერესო და ტრენდული ხდებოდა საზოგადოებასთან ურთიერთობის დისციპლინა. ჩემი ინტერესი იყო შემესწავლა და მემუშავა ამ მიმართულებით. ამისთვის დამჭირდა ცოდნის გაღრმავება. გავიარე სადიპლომო კურსი ლონდონის პიარ სკოლაში, სადაც წარმატებული კომპანიების მაგალითებით გვასწავლიდნენ გაერთიანებულ მარკეტინგულ კომუნიკაციებს. ჩემთან ერთად კურსზე ისხდნენ ისეთი დიდი კომპანიების თანამშრომლები, როგორიც არის ნესტლე, ბრიტანული ბანკები. კურსის დასრულების შემდეგ შევუდექი ამ სფეროში აქტიურ მუშაობას. იყო საგარეო საქმეთა სამინისტრო – 6 თვიანი სამუშაო გამოცდილებით, და ამ ეტაპზე არის კომპანია აიდიეს ბორჯომი საქართველო. თუმცა, ეს ეტაპი უკვე მეთორმეტე წელია გრძელდება.  სხვადასხვა ეტაპზე ვკითხულობდი ლექციებს – წერა პიარში, სტრატეგია და ტაქტიკა, კრიზის მენეჯმენტი.  ძალიან საინტეერსოა ის საქმე რასაც ვაკეთებ. პირველ რიგში, მხიბლავს ის, რომ მრავალმხრივია.

რა არის საჭირო საზოგადოებასთან, წარმატებული კომუნიკაციის ჩამოსაყალიბებლად?

გულწრფელობა, იმ თემებზე საუბარი, რაც აინტერესებს მიზნობრივ აუდიტორიას და აუცილებლად დიალოგის რეჟიმში ყოფნა.

-3 რჩევა, რომელსაც მისცდემდით მას ვისაც ამ სფეროში მოღვაწეობა სურს.

საზოგადოებასთან ურიერთობა ისეთი დისციპლინაა, რომლის ეფექტიანი მართვისთვის საჭიროა იყო მრავალმხრივ განათლებული, ფლობდე ძალიან დიდი მოცულობის ინფორმაციას, როგორც მიმდინარე მოვლენების შესახებ ღია წყაროებში არსებულს, ასევე, კულუარულს. არ უნდა შემოიფარგლო იმ ამბებით, რომელიც კონკრეტულად იმ სეგმენტის გარშემო ვითარდება, რომელშიც მუშაობა გიწევს. ეს არის პროფესია, სადაც ხშირად განმსაზღვრელია ზოგადი ამბები: ის თუ რა ხდება ქვეყანაში, როგორი დინამიკაა ეკონომიკაში, რა სიახლეებია საგადასახადო კუთხით, რაზე მსჯელობს პარლამენტი და ასე შემდეგ. ანუ მუდმივად უნდა იყოთ ყველა ახალი ამბის საქმის კურსში და მთავარი, უნდა გიყვარდეთ ადამიანები და მათთან ურთიერთობა. გადაწყვეტილების სწრაფად მიღების უნარი უნდა გქონდეთ და თუ საჭიროა შუა გზაში ამ გადაწყვეტილების შეცვლის და სტრატეგიის გადახედვის.

რის ცოდნის ქონას ისურვებდით კარიერის დაწყებამდე პიარის სფეროში?

საკმაოდ მომზადებული მოვედი ამ სფეროში. ცოდნით ალბათ ბევრი რამ ვიცოდი, თუმცა წლებმა მოიტანა ის, რომ უფრო გამომდის ემოციის მართვა. სიმშვიდე და ცივი გონებით მუშაობა ძალაინ მნიშვნელოვანია ამ სფეროში. 

-როგორია თქვენი ტიპური სამუშაო კვირა?

ყოველთვის აქტიური – პროექტები, შეხვედრები, თათბირები, პრეზენტაციები. ყველაზე დიდი ადრენალინი ახალი წარმატებული  პროექტია. წარმატების გაზომვა დღეს საკმაოდ მარტივია – სოციალური ქსელები იძლევა იმის საშუალებას, პირდაპირ უყურო მომხმარებლის რეაქციებს. 

-რა გზები მიგაჩნიათ საუკეთესოდ კონტაქტების და წყაროების მოსაპოვებლად?  

მე ჩემს სტუდენტებს ყოველთვის ვურჩევ, რომ არ დაიზარონ, იარონ ყველა ღონისძიებაზე, პრეზენტაციაზე, იყვნენ აქტიურები – გაიცნონ ახალი ადამიანები, გაატარონ დრო ახალ მეგობრებთან ერთად. ეს მარტივია, განსაკუთრებით მაშინ როცა ახალგაზრდა ხარ, არ გაწუხებს ოჯახური ვალდებულებები და საკუთარი დროის მართვის თავისუფლება გაქვს.  

– როგორ იწყებთ სამუშაო დღეს?

მგონია, რომ უკვე მანიაკობაში გადამდის, მაგრამ როგორც კი მობილურზე ვთიშავ მაღვიძარას, მეორე რასაც ვაკეთებ ნიუსებს ვუყურებ, როგორც ქართულს ასევე, საერთაშორისოს.

რა უნარებია საჭირო წარმატებული პიარ მენეჯერისთვის?

ბევრი უნარია საჭირო. მრავალმხრივ განვითარებული ადამიანი უნდა იყო – უნდა გქონდეს დროის მართვის უნარი.  გემოვნება სუბიექტური რამაა, მაგრამ უნდა გქოდეს განვითარებული კარგი გემოვნება, ადამიანები, როლებიც მარკეტინგში და პიარში მუშაობენ აუცილებლად დახვეწილი გემოვნების მქონენი უნდა იყვნენ, ადამიანებთან ურთიერთობის უნარი ძალიან მნიშვნელოვანია, მნიშვნელოვანის და მეორეხარისხოვანის გარჩევის უნარი, მართვა უნდა იცოდე, რადგან პიარი მმართველობითი ფუნქციაა, სხვისი შრომის დაფასების უნარი. უსასრულოდ გრძელი შეიძლება იყოს ეს ჩამონათვალი.

-რა თვისებებს აფასებთ ადამიანებში, სამუშაო გარემოში?  

რწმენას. როცა აქვს ადამიანს უნარი გადადგას მთები იმისათვის, რომ დასახულ მიზანს მიაღწიოს. გულწრფელობას, საქმისადმი ერთგულებას, მეგობრობას.

-რა არის საუკეთესო პიარ პრაქტიკა რომელსაც ტექნოლოგია ვერ შეცვლის?

ურთიერთობები – ადამიანური ურთიერთობები.

-რა ტრენდები და ინოვაციები იკვეთება საზოგადოებასთან ურთიერთობის სფეროში?

სულ უფრო და უფრო პოპულარული ხდება კორპორატიული სოციალური პასუხისმგებლობის პროექტები საქართველოში, თორემ მსოფლიოში ეს ტრენდი უკვე დიდი ხანია აღარაა. დიჯიტალი რომ ტრენდია ვიცით. ტრენდულია ინფლუენსერ მარკეტინგი. მოკლედ, უშუალო ურთიერთობები მომხმარებელსა და ბრენდებს შორის, გაცილებით სწრაფ რეაგირებებსა და გულახდილ ურთიერთობებს უდებს საფუძველს.